Innuttaasut kalaallit inatsisitigut innarlitsaalisaanerat neqeroorutit akeqanngitsut atorlugit nukittorsarneqarsinnaavoq – neqeroorutilli kommuninit atorneqanngillat
Isummersuisit Justitiameersut nuna tamakkerlugu misissuinerisa nutaap takutippaa inuit/kalaallit inatsisitigut innarlitsaalisaanerat kommunimit kommunimut assigiinngiiaartupilussuusoq. Kommunilli nammineerlutik aaqqiissutissarsiortariaqanngillat. Inatsisitigummi innarlitsaalisaanermut nukittorsaataasussanik neqerooruteqareerpoq. Taakkuli kommuninit atorneqanngillat.
Misissuineq Inuit/kalaallit Danmarkimiittut inatsisitigut innarlitsaalisaanerat Justitiamit saqqummersinneqaqqammerpoq. Misissuineq Danmarkimi kommunini 98-iusuni tamani allagaatinik takunnissinnaatitaanermit paasissutissanik, Danmarks Statistikimit paasissutissanik aamma kommunini sulisut, inuit/kalaallit aamma suliniaqatigiiffiit susassaqartut apersorneqarnerinik tunngaveqarpoq. Kommunit suliassanik qanoq suliarinnittarnerisa annertuumik assigiinngissuteqarnerat misissuinerup inernerata takutippaa. Kommunit 29-nnaat paasissutissiissutigaat inuit/kalaallit immikkut ittumik ukkataralugit suliniuteqarlutik imaluunniit suleqatigiinnernut peqataallutik. kommunillu sinneri 69-iusut assingusunik suliniuteqarnerlutik paasissutissiissutigisinnaasimanngilaat.
Kommunit nammineerlutik aaqqiissutissanik pilersitsisariaqanngillat
Kalaallit Meerartaata – Grønlandske Børnip suliniutaani Sulianik suliarinnittarneq nukittorsagaq-mi, kommunini sullissisunut inunnullu paasisimasalinnut allanut ulluinnarni sulinerminni meeqqanik, inuusuttunik ilaqutariinnillu kalaallinik naapitsisartunut nuna tamakkerlugu paasititsiniaanermik siunnersuinermillu suliniutaasumi Ivalo Parbst Frederiksen suliniuteqarnermi aqutsisuuvoq:
“Sulianik suliarinnittarneq Nukittorsagaq” Danmarkimi kommuninut neqeroorutaavoq akeqanngitsoq. Suliniutaavorlu inatsisitigut innarlitsaalisaanermik Justitiap nalunaarusiaani ukkatarineqartumik nukittorsaanissamut iluaqutaasoq.
Saqqummiinissamik ullunillu immikkut sammisaqartitsiffiusunik, qarasaasiakkut oqarasuaatikkulluunniit siunnersuinissamik, kommunip ilaqutariinnut immikkoortortaqarfiani allaffimmi aalajangersimasumik piffissalerlugu kommunini ammasumik siunnersuinissamik aammalu siunnersortinik suleqatigiinnik saaffiginnissutinut ataasiakkaanut piareersimasunik sulianilu aalajangersimasuni siunersiueqatigiinnissamut piareersimasunik neqerooruteqarpugut. Neqeroorut unammillernartunut nalunaarusiami pineqartunut toqqaannartumik sammivoq: ilisimasanik amigaateqarneq, suleriaasissat amigarnerat aamma innuttaasunik suliani pineqartuni peqataatitsinngippallaarneq. Taamaakkaluartoq kommunit ikittuinnaat neqeroorummik atuisarput”.
Innuttaasut kalaallit inatsisitigut innarlitsaalisaanerat pingaarnersiuinermi kingullinngortinneqartarpoq
Sulianik suliarinnittarneq Nukittorsagaq kommuninut kajumissutsimik neqeroorutaavoq, kommunillu atussanerlugu namminneq toqqagassaraat, kommunilli ikittuinnaat taamaaliortarput. Ivalo ima nassuiaavoq:
”Kalaallit Meerartaannit kommunit 98-iusut tamaasa suliniuteqarneq pillugu paasissutissanik nassillugit saaffigivagut, tusarfiginngikkutsigilli annikitsuinnarmik tusarfigisarpagut. Isumaqanngilanga piumassuseqarfigineqanngitsoq, ulluinnarnili sulinermi ulapaarfiusumi ilaqutariinnut immikkoortortaqarfiit pingaarnersiuinerminni salliutinneq ajorpaat. Assersuutigalugu ukioq manna kommuninut sisamanut saqqummiiartorpugut, kommunillu 98-iummata allannguinissamut tamanna naammanngilaq. Uggornarpoq – minnerunngitsumik Sulianik suliarinnittarneq Nukittorsagaq tassaammat kommunini meeqqanut ilaqutariinnullu siunnersuisartut ilisimasaannik qaffassaanissamut aammalu innuttaasut kalaallit Danmarkimiittut inatsisitigut innarlitsaalisaanerisa nukittorsarnissaannut aqqutissaq tigussaasoq nukinnillu atuiffiunngitsoq.
