Qeqqata Kommuniata aamma Grønlandske Børn - Kalaallit Meerartaata meeqqanut inuusuttunullu najorteqartitsisarnermut aaqqissuussineq Najorti pillugu suleqatigiinnissamik isumaqatigiissutertik nutarterpaat. Isumaqatigiissut ukiuni tallimani atuuttussaq Najortip ilisimaneqarnerulernissaanik aammalu meeqqat inuusuttullu isumaginninnikkut suliassaqarfiusut oqartussaasut naapinnerini immikkut attuumassuteqanngitsumik najorteqartarnissaannik qulakkeerinnissaaq.
Kalaallit Meerartaat 2014-imiilli Kalaallit Nunaanni meeqqat inuusuttullu pillugit meeqqanut najorteqartitsisalernissamik ineriartortitsivoq, pilersitsilluni ingerlatsillunilu. Qeqqata Kommunia suliniutip aallartinneraniilli suleqatigineqarpoq, isumaqatigiissutillu nutarterneqarneratigut suleqatigiinneq nukittorsaqqinneqarluni.
“Meeqqat inuusuttullu tamarmik inuunerminnut tunngasunik aalajangiinerni tusaaniarneqarlutillu peqataatinneqarnissaminnut pisinnaatitaaffeqarput. Taamaattumik Najorti suleqatigalugu isumaqatigiissutip nutarterneqarnera nuannaarutigaarput. Meeqqanut inuusuttunullu immikkut attuumassuteqanngitsumik najorteqartarnerat pingaarutilerujussuuvoq, pisariaqartitsigaangata tapersersorneqarlutillu ikiorneqarsinnaanerat qulakkeertarmagu. Suleqatigiinnerlu meeqqat inuusuttullu pisinnaatitaaffiinik, atugarissaarnerinik aamma namminneq oqaaseqarsinnaanerannik nukittorsaataavoq,” borgmesteri Malik Berthelsen oqarpoq.
Qeqqata Kommunianik sivisuumik suleqateqarneq Najortip nukittorsarneqarnissaanut siammarterneqarnissaanullu pingaaruteqarluinnartoq, Kalaallit Meerartaata allattoqarfiani pisortaq, Evi Kreutzmann, oqarpoq.
”Isumaqatigiissut ukiuni tallimani atuuttussaq aqqutigalugu Sisimiuni Maniitsumilu najortinik ilinniartitsineq nangissinnaavarput, Najortillu ilaatigut atuarfinni klubbinilu, meeqqat najuuffigisartagaanni tamani, ilisimaneqarnerulernissaa annertusarlugu. Meeqqanik suliaqartut tamarmik Najorti pillugu ilisimasaqarnissaat pingaaruteqarpoq, aammali meeqqat ilisimassavaat kommunimi isumaginninnikkut suliami pineqalerunik inersimasumik tapersersuisinnaasumik ilaqartinneqarnissamik pisinnaatitaaffeqarlutik.”
Najorti aamma meeqqat najorteqarnissamik pisinnaatitaaffeqarnerat pillugit paasissutissat
Najorti tassaavoq Kalaallit Nunaanni meeqqat oqartussaasunik naapitsinerminni peqataatinneqarnissaannik qulakkeerinneqataasunik meeqqanut illersuisartoqatigiit. Naalagaaffiit Peqatigiit Meeqqat pillugit Isumaqatigiissutaanni aalajangersarneqarpoq meeqqat aalajangiinerni taakkununnga pingaaruteqartuni tusarneqarlutillu peqataatinneqassasut, ukiuinut inerisimassusiannullu naapertuuttumik. Meeqqat najorteqarsinnaatitaanerat Meeqqat tapersersorneqarnissaannut inatsimmut 2017-imi ilanngunneqarpoq, 2023-milu erseqqissaqqinneqarpoq suliani inissinneqarsinnaaneq pineqartillugu najorteqartitsinissaq meeqqanut neqeroorutigineqartassasoq.
Najorti pillugu uani paasisaqarnerusinnaavutit.