Kalaallit Meerartaanni allattoqarfimmi pisortaq nutaaq: Allannguutit ataatsimoorluta pilersissavagut
Evi Kreutzmann Kalaallit Meerartaanni allattoqarfimmi pisortatut atorfinippoq, Julie Lynge atorfimminit tunuartoq taarserlugu.
Evi Kreutzmann Kalaallit Meerartaanni suliniutinut ineriartortitsinermullu siunnersortitut maannamut atorfeqarpoq - suliniutinik ineriartortitsineq attaveqaqatigiinnerlu pillugit suliassat isumagisarlugit.
“Kalaallit Meerartaanni sulininni takunikuuara suliniutitta meeqqat ilaqutariillu inuunerannut qanoq pingaaruteqartigineri. Tamanna minnerunngitsumik atuuppoq illersuisoqartitsisarnitsinni ’Najorti’-mi, tamatumani illersuisartugut 54-it meerartatsinnut atugarlioqqajaanerpaanut, isumaginninnikkullu suliamut ilaalersunut, annertoqisumik suliaqarput. Aammalu suliniummi ’Ikioqatigiinneq’-mi, tamatumani sumiiffinni ataasiakkaani najugaqartut ataatsimoorlutik meeqqat ilaqutariillu ingerlalluarfigiligaannik sammisaqartitsinernik peqataatitsisunik pilersitsisarput.
Allattoqarfimmi pisortatut nutaatut suleqatigiinnernik patajaatsunik suli amerlanerusunik kiisalu suliniutinik innuttaasunik peqataatitsiviusunik ineriartortitseqataarusuppunga. Kalaallit Nunaanni angalasarninni misiginikuuara, inuit ataatsimoorlutik illoqarfimminnut innuttaaqataasunullu akisussaaffimmik tigusisarnerat qanoq pingaaruteqartigisoq. Taamatut sulineq sapinngisamik tamatigut tapersersorusuppara. Isumaqarluinnarpunga tamatta immikkut akisussaaffimmik tigusigutta ataatsimoorluta pitsaasorpassuarnik pilersitsisinnaasugut.”
Kalaallit Meerartaanni suliniutinut ineriartortitsinermullu siunnersortitut atorfeqarnini sioqqullugu, Evi ilaatigut aamma KNR-imi radiukkut aallakaatitassiornermi pisortaanikuuvoq, tassanilu aallakaatitassanik sulisunillu aqutsinermik misilittagaqalersimalluni. Aaammattaaq aqutsinermik ilinniagaqarpoq.
”Atorfik taamaattoq atorfigissagaanni uummateqarfigisariaqarpoq, uangalu taamaappunga. Aammattaarli neriuutigaara attaveqaqatigiinneq aqutsinerlu pillugit misilittakkakka atorluarsinnaajumaarlugit Nuummi allattoqarfiup suli nukittunerulersinnissaanut, aamma Kalaallit Meerartaasa suliniutaasa annertuut Kalaallit Nunaanni suli ersarinnerulersinnissaannut.”
Evi Kreutzmann Nuummi allattoqarfimmi pisortatut atorfittaamini sulilissaaq 1. juni 2026.