Meeqqat Ulluat: Meeqqat oqaluttuartippavut
Meeqqat Ulluat 1. juni nalliusseqqarmerparput. Kalaallit Nunaanni ulloq taanna meeqqanut immikkut pingaaruteqartuuvoq, tassanimi meeqqat, ilaquttat nalunngisallu sinerissami illoqarfinni nunaqarfinnilu assigiinngitsuni katerisimaartarput aamma aaqqissuussanik sammisaqartitsinernillu pissanganartunik peqataaffiginnikkiartorlutik.
Ulloq taanna malunnartinniarlugu meeqqat oqaluttuartippavut: Suna soqutigisarivaat? Sunngiffimminni qanoq sammisaqartarpat? Aamma namminneq aalajangiisinnaasuugunik suna allanngortikkusussagaluarpat?
Alma Josefsen, 11-nik ukiulik Narsami najugaqarpoq: “Nammineq tamatigut aalajangiisinnaasuuguma Trump peersissagaluarpara, Kalaallit Nunaat pigilerusummagu.”
Ataataga, nukaara kiisalu qatanngutisiakka marluk angajulliit najugaqatigaakka. August 2024-mi anaanaga annaavara, puammigut unittoorluni toquvoq. Nukara pingasunik ukioqarpoq meeqqerivimmilu Narsarmiutamiittarluni.
Atuarfimmi sunngiffimmilu amerlanertigut ikinngutikka ilagisarpakka. Ataatsimoorluta pinnguaqatigiittarpugut, qaqqani illoqarfimmilu pisuttuaqatigiittarluta assigiinngitsunik silami pinnguaateqartarluta. Ukiukkut Narsami ilaanni apineq ajorpoq, kisianni ilaanni aputeqartorujussuusarpoq.
Nammineq tamatigut aalajangiisinnaasuuguma Trump peersissagaluarpara, Kalaallit Nunaat pigilerusummagu. Nuna pigineqarsinnaanera eqqumiigivara, tamannalu aamma ernumatigisarpara. Aamma kissaatiginartikkaluarpara Nuummisut naluttarfittaarnissarput. Tikeraartillunga tassani naluttarnikuuvunga, nuannersorujussuuvorlu.
Eigil Hansen Fontain, 11-nik ukiulik Narsami najugaqarpoq: “Hestera Sikumik ateqarpoq. Angisuunngoruma savaatilinngorusuppunga, Itillimi imaluunniit Qassiarsummi. Aamma qaqqasiortartunngorusuppunga.”
Anaanaga, ataataga nukaralu Gordon marlunnik ukiulik najugaqatigaakka.
Angerlarsimaaraangama assigiinngitsunik tv-iikkut pinnguaatinik pinnguaateqartarpunga. Warzone, Fortnite, Roblox aamma FIFA amerlanertigut pinnguaatigisarpakka. Pinnguaatini ajugaagaangama nuannaartaqaanga.
Silamiikkaangama ikinngutikka peqatigalugit toqqortaattarpugut, illoqarfik tamarmi toqqorfissaqartarami. Kisianni illunut iserluni toqqortoqaqqusaanngilaq. Nuannersorujussuusarpoq, ilaanni ilagut sivisoorsuarmik ujartarpagut.