Klara aasaanerani tammaarsimaaqatigiinnermi kajumissutsiminik suleqataavoq:“Pilersaarutiginngisagut pisuni nuannernersaapput”.

Københavnimeersoq 28-nik ukiulik Klara Dalgaard Reetz Narsami aasaanerani tammaarsimaaqatigiinnermi kajumissutsiminik suleqataavoq. Klara aallannginnermini piareersaateqareersimavoq meeqqallu sunik sammisaqartissanerlugit nalunngereerlugu. Taamaakkaluartoq pilersaarutaanngitsut pisuni nuannernersaapput aamma annertugisassaangitsut ataatsimooqatigiissutigineqarput.

Aasaanerani tammaarsimaaqatigiinnermi ullut nuannernerpaat Klaramut oqaluttuareqquagut.

Ulluni nuannernerpaani # 1: Pinnguarnerit piareersarneqarani aallartittut

Ullumi Aasiviliarpugut, festivali ukioq manna Narsami sammisaqartitsiffiusoq ornillugu. Pisussalli amerlanersaat silarlunnera pissutigalugu taamaatiinnarneqarput. Ullulli ilaanni meeqqat ilaat festivalimukaqatigivagut, naallu anori, sila, ippernat sialullu akornusersuigaluartut ulloq nuannerluinnartumik ingerlavoq sammisaqaqatigiilluarlutalu. Tupiarannguami qasuersaarfissatut tamusserfissatullu napparneqarsimasumi meeqqat kajumissutsiminnillu suleqataasut tamarmik katersuupput.

Balloninik nassarpugut, festivaleqataasunut agguaassassatsinnik. Taakku pullappagut, tassanngaannarlu meeqqat kajumissutsiminnillu suleqataasut akornanni pinnguarneq aallarteriataarpoq. Balloninik milloorpugut, nipilersuutigalugit, kiinnanik titartaaffigalugit, eqqorniaqattaarlugit, nutsanut tagiullugit nutsat tikkortillugit il.il.. Pilersaarutigisatsinnit allarluinnarnik aliikkusersoqatigiippugut.

Uannut ulloq taanna nuannernerpaat ilagilerpaat. Meeqqat ilarpassui aatsaat qanimut sammisaqaqatigaakka, ullormilu pisut nuannisaqatigiinnissap qanoq ajornanngitsigineranik takutitsipput. Sammisassanik pilersaaruterpassuaqartariaqanngilaq imaluunniit silagittariaqanngilaq. Festivalertussat takkutinngikkaluartut, sammisassallu taamaatinneqaraluartut aammalu ullup annersaani sialleraluartoq ulloq             tammaarsimaaqatigiinnermi nuannernerpaat ilaattut eqqaamavara.

Ulluni nuannernerpaani # 2: Meeqqat nammineertinneqarnertik ilikkagaqarfigisarpaat

Narsami teknikkimik ilinniarfiup qisukunik atorsinnaasatsinnik tunissuteqarfigaatigut. Uangalu illuliassanik titartaasartutut ilinniagaqarama sanasunngorniarnerullu ilaa ingerlassimagakku qisuit atorlugit sammisassanik pilersaarusiornissara naleqquppoq.

Qanoq ililluta illuaraliorsinnaanitsinnik, imaluunniit meeqqat nammineerlutik sunik sanaassaminnik qanoq pilersaarusiorsinnaanerannut titartaasinnaanerannullu isumassarsiarpassuit aallarniutigaakka.

Paasilertupallapparali oqaatsitigut paaseqatigiinniarnermik, ataasiinnarmik suliaqarniarnermik sammisassallu ullorpassuarni ingerlatassaanngitsut iluatsitsiffiusarnerannik misilittagaqarneq pissutigalugu suliassaq allaanerulaartumik ingerlattariaqarlugu.

Taamaammat aneersuartarfimmi nammineq aallartiinnarpunga. Taamaalillutik soqutiginnittut alakkarsinnaaniassammannga, ikiuullutik sanaqatigalungalu. Suliassat arlallit ataatsikkut isummerfigisariaqanngilaat sulerinersungali malinnaaffigisinnaavaat arriitsumillu nammineerlutik suliaqarsinnaallutik. Ingerlalluarpugut ”workshoppertitsineralu” soqutigineqaleriartupallappoq.

Ingammillu niviarsiararpassuit pilattuineq, qinnilinnik sukaterineq, qisunnut titartuineq il.il. misilissallugit assut soqutigaat. Qanoq iliornissaminnik ilikkapallannerat assut alutornarpoq. Aamma qanoq tulleriiaarissanerlutik, suut mianersuutissanerlugit paasipallappaat sakkullu ilatillu paarilluarlugit.

Meeqqat nammineertillugit qanoq ilikkalertupallattarnerannik workshoppi ilinniarfigaara. Skruemaskiinamik pilattuummillu atuitinnissaat aallaqqaammut annilaanganartikkaluarlugu pikkoreqaat. Ataatsimut isiginnissinnaalluarluni eqqortumillu periaaseqarfigalugu tamanut toqqissisimanartumik nuannersumillu ingerlanneqarpoq.

Iperaalaarnissaq ilaanni pitsaanerusarpoq. Ajutoortoqarsinnaanerami, meeqqalluunniit nutaanik misiliinissamut ilumut piareersimanersut annilaanganartikkaanni aamma nammineertinnissaat tunuarsimaarfigineqartoorsinnaasarmat. Ilikkassagaannili nammineernissaq, kukkulaarnissaq atortullu qanoq atornissaasa ilinniarnissaat pingaaruteqarpoq.

Ulluni nuannernerpaani # 3: Pequernerit ukkataqarnerlu

Meeqqat ullumikkut nipilioqalutillu pequffapput. Siallilaarsimariarmat illup iluaniinneruvugut.

Kajumissutsimik suleqatigalu, Viktor, tupaarnanik katerserusulluta eqqartornikuuarput, taamaammat meeqqanik ilaarusuttoqarnersoq aperivugut. Qujanartumillu ilaarusupput meerarpaaluillu ilagalugit katersiartorpugut.

Tupaarnanik kingusinnerusukkut panerseriarlugit akoorutissatut atugassatsinnik katersinerminni ukkassilluarput pimoorussillutillu. Tamarmik ikiuupput allamilu katersiffigisinnaasatsinnukaattarluta. Illumit anilaarnissamut periarfissaavoq nuannerluinnartoq, peqatigisaanillu ataatsimoorfigisinnaasatsinnik pisassaqartitsilluni.

Kingusinnerusukkut meeqqat apersulerput arsaattarfiliarsinnaanersugut, taamaaliorpugullu. Pinnguarnerillu imminik aallartittutut ipput. Ilaat rugbymik Marcosimit ilinniartinneqarput, allat attortaapput, allallu allanik aamma sammisaqarlutik.

Ataatsimik sammisaqarnerup allanut ingerlaqqissinnaanera nuannersumik misigeqqipparput. Sulerinissatsinnut qaqugukkullu taamaaliornissatsinnut tamatigut aalajangersimasumik pilersaaruteqartariaqanngilaq. Ilaannimi nuannernerpaat sammisaqarnermi pilersarput.

Ullormut sammisat tassaapput rugbymik attortaannermillu pequffannerit aammalu qaqqami tupaarnartarnitsinni ukkassinerit pimoorussinerillu. Ullut nuannarinerpaasama ilagivaat.