Sammisaqartitsinerit inuusuttut atugarissaarnissaannik atassuteqarnerannillu nukittorsaasarput
Inuusuttunut suliniummi NUKIK-mi inuusuttut nutaaliornermik assassugassatigullu sammisaqartitsinerit katersuuffigigaangamikkit ataatsimooqatigiinneq annertunerulersarpoq. Sammisaqartitsinerit inuusuttut atugarissaarnissaannik atassuteqarnissaannillu nukittorsaanissamut sakkutut atorneqartartut, meeqqanut inuusuttunullu ilitsersuisartoq Christina Edvardsen oqaluttuarpoq.
NUKIK inuusuttunut meeraanermit inersimasunngornermut ikaarsaalernerminni inuusuttutut inuunerminni inooqataanikkut, misigissutsitigut aqqusaakkaminni tapersersorneqarnissamik iluaquteqartunut sammitinneqarpoq, aqqusaarneqartartut inuusuttut ilaannut sakkortullutillu unammillernarsinnaasarmata.
NUKIK-mi kalaallit inuusuttut 14-17-inik ukiullit ataatsimooqatigiinnermi nukittuumi sapiissusermik qanorlu iliorsinnaassuseqarnermik inerisaanissamut assigiinngitsunik sammisaqartillugit katersuutsittarpagut. Inuusuttut inuusuttutut inuunerminni aqqutissiornissamut sakkussaminnik pissarsisarput, aammalu kissaatimik takorluukkamillu oqaasinngortinnissaannut imminnullu anguniagassinnissaannut tapersersorneqartarput imminnullu naleqartunik aalajangiisarnissaminnut kajumissaarneqartarlutik.
Naatsorsuutiginngisamik iluatsitsiffeqarnerit
Weekendimi naapisimaaqatigiittarnerit NUKIK-mi annertuumik pingaarutilimmillu inissisimapput. Meeqqanut inuusuttunullu ilitsersuisartoq Christina Edvardsen ima oqaluttuarpoq:
”Weekendini naapisimaaqatigiinnerni ataatsimooqatigiinneq ineriartortinneqartarpoq. Inuusuttut atassuteqarfigisaqalersarput kikkullu tamarmik pingaaruteqarnerat malugisinnaallugu. Weekendip ingerlanerani assigiinngitsunik sammisaqartitsisarpugut inuusuttut peqataaffigisaannik. Sammisaqartitsinerillu weekendimit weekendimut assigiinngitsuusarput, nutaaliornermilli assassugassatigullu sammisaqartitsinerit NUKIK-mi sammineqartuaannarput.
Inuusuttut assassugassanik suliassat, pinnguaatit imaluunniit nerisassioqatigiinnerit ataatsimooqatigiissutigigaangamikkit oqaloqatigiinnerit nuannersut pilersarput, aammalu illaqatigiittoqartarluni. Sammisaqartitsinerit aamma naatsorsuutiginngisamik iluatsitsiffeqarsinnaasarput, taakkulu annertusaqqinnissaat pingaaruteqarsinnaasarpoq. Sammisaqartitsinerit taamaalillutik inuusuttut atugarissaarnissaannik atassuteqarnerannillu nukittorsaanissamut perorsaanikkut sakkutut atorneqartarput”, Christina oqaluttuarpoq. Taanna aamma inuusuttut weekendini naapeqatigiittarnerisa ilaannut peqataarusussinnaasunik kajumissutsimik suleqataasussanik maannakkorpiaq pissarsiorpoq.
”Inuusuttunut sammisaqartitsinermik isumaginnikkusuttunik kajumissutsiminnik suleqataarusuttunik pissarsiorpugut. Qisuit atorlugit sananermik imaluunniit pinnersaasiornermik pinngortitamiluunniit sammisaqartitsinermik immaqa imaqarsinnaavoq. Sunilluunniit sammisaqartitsisoqarsinnaavoq, inuusuttut amerlanngitsut pilersitseqatiginissaat pingaarneruvoq”.
