Aasarsiortitsineq Narsami piffissami sivisunerusumi suliniummut aallarnissataassaaq
Julimi sapaatip-akunnerini marlunni Narsaq sammisaqarfiussaaq, namminneq kajumissutsimikkut sulisut nunanit tamalaaneersut, Narsami innuttaasunik peqateqarlutik ataatsimik siunertaqarlutik ingerlatsilerpata: meeqqat inuusuttullu nuannersumik sammisaqarfiulluartumillu aasarsiortinnissaat. Kisiannni meeqqanik inuusuttunillu sammisaqartitsineq namminneq kajumissutsimikkut sulisut aallarpata uniinnassanngilaq. Tassami aasarsiortitsineq piffissami sivisuumi suliniummut, ’Ikioqatigiinnermut’, aallarnisaataassaaq - suliniummi tassani Narsami najugallit illoqarfimminni meeqqat, inuusuttut ilaqutariillu inuunerissaarnissaannut suliniutaanni ataatsimooqatigiiffinnillu inerisaaneranni ikorfartuutaassaq.
Aasaq manna Narsaliarutta, illoqarfimmi siullermeertumik aasarsiortitsisoqassaaq. Ilutigisaanik Kommune Kujallermik Narsarmiunillu suleqateqarnerput aallartissaaq.
Nuummi allattoqarfimmi pisortaq Evi Kreutzmann oqaluttuarpoq:
”Aasarsiortitsisarnerit ukiuni arlalinni annertunerusumik isiginiarnikuuagut, najukkami inuiaqatigiit itinerusumik suleqatigisalernissaannut aallarnissaatitut, aasarsiortitsinerlu Narsami piffissami sivisunerusumi pitsaasumik ineriartortitsiniarluni suliniuteqarnissamut aallarnisaatitsialaavoq.
Narsaq illoqarfiuvoq nammineq kajumissutsikkut sulinermik tulluusimaarutissanik pitsaasumillu misilittagaqarfiulluartoq, kisianni ataatsimooqatigiiffinnut amerlanerit peqataasarnissaat pisariaqartinneqarpoq, tamatumanilu suliniutit Narsami meeqqanut, inuusuttunut ilaqutariinnullu iluaqutaasussat ikorfartorsinnaavagut, neriunartumillu annertusiartortillugit.”
Kalaallit Meerartaat Aasivimmi peqataassapput
Narsami aasarsiortitsineq immikkuullarittussaavoq. Kalaallit Meerartaat Aasivimmik suleqateqalerput. Aasivik ukioq manna Narsami ukiunik 50-inngortorsiorluni nalliuttorsiussaaq, Narsamiissallunilu aasarsiortitsinerup ingerlanneqarfiata nalaani.
Aasivik qangaaniilli aasakkut katerisimaartarfiuvoq. ’Aasivik’ sumiiffinni assigiinngitsuni ingerlanneqartarpoq, inuillu illoqarfinnit nunaqarfinnillu assigiinngitsuneersut naapittarput. Sammisaqartitsinerit, ataatsimooqatigiinnerit workshoppertitsinerillu peqataaffiginerisigut meeqqat inuusuttullu imminnut ilisarisimalersarput, pisinnaasanik nutaanik ilinniarlutik misilittakkaminnillu paarlaateqatigiillutik.
”Aasivik peqatigalugu sammisaqartitsisarnissagut qilanaarivakka - illoqarfimmi meeqqanut inuusuttunullu nuannissaqaaq,” Evi Kreutzmann naggasiivoq.
2014-imiit Kalaallit Meerartaat sinerissami illoqarfinni nunaqarfinnilu assigiinngitsuni aasarsiortitsisarput. Aasarsiortitsinerni pingaarnerpaatinneqarpoq meeqqat inuusuttullu nuannersumik sammisassaqarfiulluartumillu aasarsiortinnissaat. Namminneq kajumissutsimikkut sulisut nunarsuarmit tamarmeersut najukkami namminneq kajumissutsimikkut sulisut peqatigalugit meeqqanut timersuutinik pilersitsillunilu sammisassanik ingerlatsisarput.