Ukioq manna Folkemøde-mi ullunut nuannersunut qujanaq

Ukioq manna Bornholmimi Folkemøde-miit angerlaqqammerpugut. Ulluni pingasuni oqallinnerpassuit aaqqissuussarpassuillu ingerlanneqarput, taakkunanngalu oqaluttuarisaanermi aatsaat taama amerlatigisut Kalaallit Nunaannut tunngasuullutik. Kisimiinngilagut. Inuit 100.000-it missaanniittut Bornholmimi Allinge-liaasimapput. Taakku ilagaat Nuummi Kalaallit Meerartaanni allattoqarfimmi pisortanngorlaaq Evi Kreutzmann. Suna Evi-p maluginiarnerpaavaa? Allinge-milu ullunit ulapaarfiusunit suna pissarsiaraa?

“ Pitsaanerpaaq pingaarnerpaarlu tassaavoq UNICEF-ip aaqqissuussaanik oqallinnermut susassaqartut allat uagutsitut suliaqartut peqatigalugit peqataanissamut periarfissaqarneq. Tamanna susassaqartut allat uagutsitut suliaqartut issiaqatiginissaannut periarfissatsialaavoq, tassanilu meeqqat inuusuttullu ingerlalluarnissaat, pisinnaatitaaffiit inuiaqatigiinnullu peqataanerat pillugit oqalliseqataallunilu alapernaassinnaaneq.

Maluginiarluakkama ilagaat ’Ungdomsbureauet’ - kalaallit inuusuttut scenemut qaqillutik atuakkamit ’(Taakku) Kalaalllit’-nit oqaluttuaminnik atuffassinissaannik aaqqissuussisimasoq. Taakku misigissutsit Danmarkimi nalaattakkatsik – uanga aamma nalaattarnikuullugillu suli nalaattakkakka - oqaluttuarivaat.

Sassarlutik imminorpiaq taama tunngalluinnartigisunik oqaluttuarnissaminnut sapiissuseqarnerat annertoqisumik nersualaagassaavoq.”

Kreutzmann oqalliseqataavoq ukua ilagalugit: Stina Sværd, Meeqqat pisinnaatitaaffiinik Sullissivimmi MIO-mi meeqqat oqaaseqartartut, Erni Kristiansen, Røde Kors Ungdom Kalaallit Nunaat /KRK INUA, Naaja Nathanielsen, Inuit Ataqatigiinnit Folketingimut ilaasortaatitaq aamma Line Grove Hermansen, UNICEF Danmark

Oqallinnerni peqataaffigisanni sammisanik qulequttanillu utikattoqarpa?

Oqallinnerni assigiinngitsuni maluginiagara tassaavoq Danmarkimi aningaasaateqarfiit suliniutiminnik kalaallit kulturiannut naleqqussaasarnissaasa pingaaruteqartuuneranik oqariartuuteqarneq. Pitsaalluinnartumik suliniuteqartoqarsinnaavoq, kisiannili Kalaallit Nunaanni piviusunngortitsiniarnermi sivisuumiik attaveqaatitaartoqqaarnissaq iluatsitsinissamut pingaaruteqarpoq.

Naapeqatigiinneq sorleq maluginiarnerpaaviuk?

Mette Frederiksen naapikkakku. Oqaatsit amerlanngitsut atorlugit isiminillu uannik ataqqinnilluni naapitsinerata Kalaallit Meerataasalu pingaarutilimmik sulinerannik akuersaarnera, maluginiarluarpara.

Meette Frederiksenip naapinnera immikkut ittumik nuannersuuvoq, Evi Kreutzmann oqarpoq.

Siullermeerluni Folkemøde-mut peqataaneq qanoq misigiviuk?

Tamatigut pissarsinaqaaq. Inuppassuit, ataatsimiinnerpassuit, isummat assigiinngitsorpassuit. Paasivara pingaartuusoq ataatsimiinnerit aaqqissuussinerillu peqataaffigerusutat toqqartornissaat pingaartuusoq. Tamarmik angumerineqarsinnaanngillat, taamaammat siumut pilersaarusioreernissaq pingaartuuvoq.

Allattoqarfimmi pisortatut sulininni atorsinnaasattut suut Folkemøde-mi pissarsiarivigit?

Folkemøde-mi attaveqaatima amerlisarnissaat periarfissarsivara. Suliassara tassaannaanngilaq ulluinnarni ingerlatsineq, aammattaarli nutaanik suleqatitaartornissaq. Inutsialappassuit suli annertunerusumik oqaloqatigerusutakka naapippakka.

Arlaannik sivisuumik eqqaamajumaakkannik pisoqarpa?

Kalaallip nipilersortartup Joesef Tarrak-p tusarnaartitsineranut peqataavugut. Erinarsuusiaasalu ilaanni versi uteqattaartoq annertuumik maluginiarpara.

Nunami maani aniinnartut, nunami maani imiinnartut, nunami maani nivinngarl, nunami maani qimiinnarl

Sivisoorsuarmik puigunngilara. Tusarnaartitsineq tamarmik nuannisarfiullunilu inunnik nuannaartunik naapitsiffiuvoq. Kisianni piviusut naapertorlugit oqimaaqisut pillugit erinarsorpoq: Inuit nunaminnik qimatsisut (allatut sapilerlutik) nunataaminni imiinnartut, nunaminni imminortut, qimillutik … Oqaasertaasut sakkortoqaat.

Josef Tarrak ukioq manna Folkemøde-mi tusarnaartitsivoq, sakkortuunik oqaasertalinnik nipilersorlunilu erinarsorluni.