Ukiumi ataatsimi efterskolimi atuarneq Danmarkimi inuusuttut kalaallisut tunuliaqutaqartut inuunerannut allanngueqataasinnaavoq. Efterskolimiinneq qanoq allanngueqataasinnaatiginersoq, aammali aningaasatigut pissutsit inuusuttut periarfissinneqarnissaannut aporfiusinnaasarnerat Grønlandske Børn – Kalaallit Meerartaanni takusarparput. Dudekfondenip aningaasaliissuteqarneratigut kalaallit ilaqutariit efterskolimiinnermut atatillugu aningaasartuutit assigiinngitsorpassuit matussusernissaannut maanna ikiorsersinnaalerpavut.
Ukiumi ataatsimi efterskolimiinneq inuusuttunut Kalaallit Meerartaanni naapittakkatta ilarpassuinut atuarnerinnaasanngilaq. Amerlasuutigut tamanna qasuersaarnissamut periarfissaasarpoq, inuunermilu allannguutaasinnaalluni. Aalajaatsumik inuuneqalernissamut, ataatsimoornermik misigisaqarnissamut namminnerlu piginnaasaminnut upperinnilernissaannut periarfissaasarpoq. Inuusuttunut kisimiittutut misigisartunut, oqaatsitigut aporfilinnut, imminnut tatiginnginnerusunut imaluunniit angerlarsimaffimmi eqqissiviilliorfiusuneersunut efterskoli inersimasunik isumassuisunik, aaqqissuussaasumik sinaakkutilimmik pisussaaffeqarlunilu ataatsimoorfiusumik ulluinnarsiuteqarnissamut periarfissiisinnaavoq. Tassaasinnaavorlu namminneq iluatsitsisinnaanerminnik paasisaqarfigisinnaasaat.
Peter Berntsen Grønlandske Børn – Kalaallit Meerartaanni inuusuttunut ataqatigiissaarisuuvoq. Ima oqaluttuarpoq:
” Ilaqutariinnut sullittakkatsinnut amerlasuunut aningaasaqarnikkut pissutsit aporfiunerpaasarput. Efterskolimiinnermut aningaasartuutit tapiissutit pioreersut aqqutigalugit amerlanertigut matussuserneqarsinnaapput, taakkulu qinnuteqaatiginissaannut ilaqutariit ikiortarpavut. Aningaasartuutinilli allarpassuarnik aamma malitseqartarpoq. Efterskolimiinnermut aningaasartuutit saniatigut atisanut timersuutinut qarasaasiamullu, paasisassarsiorluni angalanernut, ataatsimoorluni sammisassanut aammalu angerlarsimaffiup efterskolillu akornanni angalanermut aningaasartuuteqartarpoq. Tamakkulu tamaasa akilernissaat ilaqutariit amerlasuut akissaqartittanngilaat”.
Amerlanerusut periarfissaqalissapput
Dudekfondenip aningaasaliissuteqarneratigut tapiissutinik immikkoortitsisinnaasimavugut ilaqutariit efterskolimiinnermut atatillugu aningaasartuutinut malitsinut matussutissanik qinnuteqarnissamut periarfissaqalersillugit.
” Inuusuttut naapittakkatta ilarpassuinut efterskolimiinneq unikaallalaarnissamut periarfissiisimavoq, inooqataanikkullu aamma ilinniarnikkut iluaqutaasimaqaluni. Tapiissutinik qinnuteqarfissaq nutaaq aqqutigalugu neriuutigaarput inuusuttut suli amerlanerusut efterskolernissamut periarfissaqalissasut”, Peter Berntsen naggasiivoq.
Ukioq ataaseq efterskolerneq annertuumik allanngueqataasinnaavoq. Inersimasut aamma taamaaliorsinnaapput. Kajumissutsimik mentorinngorusuppit?
Ukiumi ataatsimi efterskolernerup iluatsilluarnissaanut aningaasatigut pissutsit kisiisa aalajangiisuunngillat. Inersimasulli inuusuttut avatangiiserisaat aamma pingaaruteqarput. Niviarsiaqqamut 16-inik ukiulimmut, Jyllandip avannaani Mariagerimi efterskolertumut, kajumissutsiminik mentorinngorusuttumik maannakkorpiaq pissarsiorpugut.
Mentoritut assersuutigalugu qaammammut ataasiarlutit pulaarsinnaavat, attaveqarfigillattaasarlugu ulluinnarnilu kajumissuseqarnissaanik atugarissaarnissaanillu tapersersorlugu. Grønlandske Børn – Kalaallit Meerartaanni sulisumit aalajangersimasumit ingerlaavartumik siunnersorneqartassaatit.
Paasisaqarnerorusukkuit Phoebemut attaveqarsinnaavutit uunga: pr@fgb.dk imaluunniit oqarasuaatikkut: +45 5146 0337