NajagtâK meeqqanik illersuisartuuvoq Sisimiuni: "Meeqqap malugissavaa piffissaqarfigilluariga"
Najagtâp meeraq isumaginninnikkut suliamut ilaatinneqalersoq naapikkaangagu, allagaatit illikartillugit meeraq tusarnaartarpaa. Najagtâp oqaatigaa suliassani pingaarnerpaaq tassaasoq meeqqamut toqqissisimanermik eqqissinermillu pilersitsinissaq, meeqqap toqqissinanngitsunik nalaataqarnerata nalaani.
NajagtâK Sisimiuni najugaqarpoq 2018-imilu aallartinnerminiit meeqqanik illersuisartutut suliat 30-t sinnerlugit peqataaffigisimavai. Meeraq isumaginninnikkut suliamut ilaatinneqaraangat, amerlanertigut meeraq misigisaminik artornartunik pakatsisimanernillu nammataqartarpoq, tamakkulu eqqartornissaat meeqqamut ajornakusoorajuttarluni. Tassani NajagtâK meeqqanik illersuisartutut immikkut pingaarutilimmik inissisimavoq.
Meeqqap naapinnerani Najagtâp suliassaasa pingaarnerit ilagaat tusarnaarnissaq. Tamatumani meeqqat nukarliit arlaleriarlugit sivikitsumik naapeqatigineqarajuttarput, tatigeqatigiinneq arriitsumik pilersikkiartorniarlugu. Meeqqat angajulliit attavegeqqaarnerat nalinginnaasumik oqarasuaatikkut pisarpoq. Tatiginninneq sivisuumik pileriartortarpoq, Najagtâllu ilikkarnikuuaa, tamanna nukinngunneqarsinnaanngitsoq. Arriitsumik meeraq ima toqqissisimalertigisarpoq, artorsaatigisani oqaluttuarisinnaanngorlugit.
Najagtâp meeraq ilagisarpaa
Tatigeqatigiinneq pilersinneqareeraangat Najagtâllu meeraq ilikkaraangamiuk, suliamut meeqqamut tunngatillugu ataatsimiinnissanut qanoq pitsaanerpaamik piareersarsinnaanertik oqallisigilersarpaat, Najagtâllu meeqqat naapitassaannut piareersalersarpai.
”Ulloq pisortanik naapeqateqarfissaq nalleraangat, meeraq naapeqatigisarpara, ingiaqatigiilluta ataatsimiigiarniassagatta. Pisoqatigiinnerput eqqissisaataasarpoq. Kommunimik ataatsimeeqateqarnissaq toqqissisimanartuunngilaq, uannullu suliassaq pingaartoq tassaavoq meeqqap eqqissisarlugulu toqqissisimalersinnissaa. Ataatsimiinneq naammassigaangat, meeraq ilagilaarallartarpara, suut tamaasa inissilluarniarlugit.”
Illersuisoqartitsisarneq Najorti pillugu annertunerusumik paasissutissat atuakkit