Qalissiat nutaat, qalipaatit ilungersorlunilu sulineq Kulloriarmi ilaqutariit illuinik allannguipput
Suleqatigiit, nunaqarfimmi innuttaasunik namminnerlu kajumissutsiminnik sulisunik nunanit tamalaaneersunik inuttallit, aasaanerani sulinngiffeqarnerup nalaani Kullorsuarmi illut nutarterlugit aallartippaat. Ullut suliffiit arfineq-pingasut atorneqarput. Namminneq kajumissutsiminnik sulisut arfineq-pingasut nunanit tamalaaneersut ullunik marlunnik kingusinaarlutik tikikkaluarput, kisianni ullut suliffiit annaasatik nukinnik amerlanerusunik suliumassutsimillu taarserpaat, sapinngisamik angusaqarnerpaajumallutik. Ullumikkut illunit 44-nit suliniummut peqataajumallutik nalunaarnikunit illut 15-it nutaanik qalipanneqarput, ilaqutariillu arfineq-marluk maanna kusertartunik qaliaarupput.
Kullorsuarmi ilaqutariit illui qaliparlaat 15-it Issittup seqerngani ersarilluinnarput. Ullut arfineq-pingasut sioqqullugit illut allarluinnaapput, qaliaat ussiillutik silataallu nungullarnikuullutik.
"Illorpassuaqarpugut nungullarnikoorujussuarnik, taamaattumik illut nutarterneqarnissaat nunaqarfimmi sivisuumik kissaatigineqarpoq, minnerunngitsumik ilaqutariit meerartallit illui eqqarsaatigalugit," taama oqarpoq nunaqarfimmi sunngiffimmi sammisassaqartitsinermi pisortaq Birgitta Kammann Danielsen.
"Suliaq annertoqaaq, kisianni ullumikkut qasungaluarluta nuannaarlutali naammassisimalerpugut, angusattalu annertussusaat tulluusimaarutigalugu." Birgitta oqarpoq. Suliniut maligassiuiffiulluartutut taavaa, neriuutigalugu ukioq tulleq iluatsitseqqittoqarsinnaassasoq, ilaqutariit amerlanerit ussilluartunik qaliaqaleqqullugit.
Nammineq kajumissutsiminnik sulisut Danmarkimeersut, Spaniameersut, Frankrigimeersut Letlandimeersullu najukkami nammineq kajumissutsiminnik sulisut peqatigalugit sulipput. Suliniut Kullorsuarmiut qanimut suleqatigalugit ineriartortinneqarpoq. Tassa Kullorsuarmiut namminneq ilaqutariit illuisa pitsanngorsarneqarnissaat pisariaqartoq saqqummiuppaat, Kullorsuarmiullu tapersersuinerat suliniutip piviusunngortinneqarnissaanut pingaaruteqarluinnarpoq.
Suliniutip aallartinnginnerani naammassineranilu assilisat. Assip siulliup assilineraniit assip aappa ullut marluk qaangiunneranni assilisaavoq. Suliaq torrak!
Iluatsitsiffiunerpaaq tassaavoq ataatsimooqatigiinnermik misigineq
"Nammineq kajumissutsiminnik sulisut Kullorsuarmeersut 40-t angullugit ullut tamaasa suliniummi peqataasarput – ilaat nammineq kajumissutsiminnik sulisunut nerisassiortarlutik ullup-qeqqasiutissaqartitsillutillu, ilaat illunik nutarterinermut qalipaallunilu suliassanut peqataallutik. Ilaqutariit siusinnerusukkut imminnut attuumassuteqarpallaanngikkaluartut, inuusuttullu inersimasullu nunaqarfimminnut ataatsimoorlutik suliniummut peqataapput, ataatsimooqatigiinnermillu misigineq annertoorujussuuvoq. Misigalugu nuanneqaaq ataatsimoorluta taama anguniagaqarluartigisumik suliniuteqarsinnaanerput angusaqarfiulluarpoq. Suliassaq taama annertutigisoq ataatsimoorluta naammassisinnaagutsigu, nunaqarfitsinnilu inuunitsinnut taama annertutigisumik iluaqutaasumik angusaqarutta, taava suut angusinnaanerlugit killissaqanngillat," Birgitta nuannaaqaluni oqarpoq, aammattaarlu nammineq kajumissutsiminnik sulisut arfineq-pingasut nunanit tamalaaneersut immikkut qujaffigalugit.
"Suleqatigiitsialaat takkupput nukissaqarluarlutik assassornikkullu misilittagaqarluarlutik, aammattaarlu ilisimasaminnik allanut ingerlatitseqqillaqqipput. Qalipaatit illut amerlaqataasa qalipannissaannut suli naammapput, qalissiallu aamma suli sinnerupput, qalissiat annikinnerusumik ajoqusernikut iluarsaassinissamut atorneqarsinnaallutik. Aamma iluatsitsilluarnertut taaneqarsinnaavoq Kullorsuarmi namminneq kajumissutsiminnik sulisut suleqatigiillutik sila periarfissaatillugu ingerlaqqinniarmata. Aamma neriuutigaarput Kalaallit Meerartaat peqatigalugit ukioq tulleq taamatut ittumik suliniuteqaqqissinnaassalluta," Birgitta naggasiivoq.
