Suleqatigiinnissamik isumaqatigiissutip Avannaata Kommuneani meeqqat pitsaasumik inuuneqarnissaat nukittorsarpaa
Meeqqat inuusuttullu inuunerinnerisa aaliangertarpaat, piffinni ataasiakkaani ineriartornissap periarfissinneqarnera. Taamaammat Avannaata Kommunea kiisalu Kalaallit Meerartaat atsioqatigiissimapput, qulakkeerinnittussamik, kattuffiup piffinni ataasiakkaani Kullorsuarmi nukittuunik suleqatiginninnissamik illoqarfimmi meeqqanut inuusuttunullu pitsaasunik periarfissiisussanik.
Qanoq ililluni illoqarfitsinni pitsaasumik peroriartortoqarsinnaava? Suut meeqqanut inuusuttunullu illoqarfitsinni takorluussavagut? Meeqqat, inuusuttut angajoqqaallu suut takorloortarpaat?
Apeqqutit taakkua ilaatigut aallaaviussapput Kalaallit Meerartaasa kiisalu Kullorsuarmi Avannaata Kommuneata ukiut arlallit ingerlanerini suleqatigiiffigisassaat. Suleqatigiinneq atserneqarsimavoq Ikioqatigiinneq – ikioqatigiitta – borgmester Lars Erik Gabrielsen-illu ataatsimoorluni suliniutissaq imatut oqaluttuarivaa:
”Meeqqat siunissarivagut, takuterusupparpullu, inuunerissuunissaat ilumoorukkipput tusarnaarusukkigullu pitsaasunik nassaarnissatsinnik, Kullorsuarmi meeqqat pitsaanerusumik inuuneqalernissaannik pilersitsinissamut. Nuannaarutigaara takullugu illoqarfimmi innuttaasut tamanut ataatsimiititsinerni tapersersuillutik siunnersuuteqartarneri, piumassusertillu aallaavigalugu suleqataajumallutik sassartartut, isumassarsiarpassuit pitsaasut piviusunngortinneqaleraangata illoqarfimmi meeqqanut, inuusuttunut ilaqutariinnullu najugaqartunut nuannaarutaasumik”.
Tatiginninneq ikiuerusunnerlu annertooq
Kalaallit Meerartaat ukiuni arlalinni Kullorsuami aasaanerani aallaarsimaartitsisarsimavoq, maannakkullu suleqatigiinneq annertunerulersinneqarallarpoq 2027-ip tungaanut suliniut Ikioqatigiinneq aqqutigalugu. Aasaq manna ikioqatigiinneq aqqusinermi takuneqarsinnaavoq, illoqarfimmi najugallit tikittullu piumassusertik aallaavigalugu suleqataasut ilaqutariit illui pisariaqartitsinerpaasut iluarsaatissagamikkit.
”Nuaannaarutigaara qanimut tatigeqatigiilluni Avannaata Kommunealu suleqatigiinnerput, sumiiffimmi nukinni pingaaruteqarnerpaani pitsanngorsaaniartut – tassa meeqqanut inuusuttunullu. Tamanna taamaallaat iluatsissinnaavoq, illoqarfimmi amerlasuunik inoqarmat tunniusimalluartunik, najukkaminni sassartartunik. Tamanna tulluusimaarutigaara, kattuffittut tapersersorsinnaangatsigu”, oqarpoq Kalaallit Meerartaanni allaffeqarfimmi pisortaq Evi Kreutzmann.
IKIOQATIGIINNEQ PILLUGU
Suliniut Ikioqatigiinneq piffinni ataasiakkaani pisariaqartitsineq aallaavigalugu pinngorpoq, piumassusertik aallaavigalugu sulisunit ingerlanneqarluni, sammisanik suliniutinillu pilersitsisarluni meeqqanut, inuusuttunut ilaqutariinnullu inuunerinnermik pilersitsisumik. Ikioqatigiinneq Nordea-fondimit tapersersorneqarpoq, maannakkorpiarlu Nanortalimmi, Narsami, Qeqertarsuarmi Kullorsuarmilu ingerlanneqarluni.